Róbert Árni Hreiðarsson, eða Robert Downey líkt og hann kallar sig í dag, hlaut uppreist æru síðastliðinn september. Hann var dæmdur fyrir barnaníð árið 2008 fyrir kynferðisbrot gegn fjórum stúlkum. Hæstiréttur staðfesti í dag úrskurð Héraðsdóms Reykjaness þar sem svipting réttinda hans til að starfa lögmaður var felld niður. Það þýðir að hann má á ný starfa sem lögmaður.
Í frétt Vísis í september árið 2007, skömmu eftir að Róbert var dæmdur í þriggja ára fangelsi, sagði Helgi Jóhannesson, þáverandi formaður Lögmannafélags Íslands, að Róbert myndi ekki starfa sem lögmaður aftur þar sem lögmönnum beri að vera með óflokkað mannorð. Það hefði hann ekki nema forseti Íslands veitti honum uppreist æru að tillögu innanríkisráðherra og það er það sem gerðist eftir að hann var dæmdur, samkvæmt dómi Hæstaréttar.
Með óflekkað mannorð
Í dómi Hæstaréttar kemur fram að Róbert hafi af því ríka hagsmuni að fá aftur réttindi til að starfa sem héraðsdómslögmaður. Hann ætli sér að sinna samskonar störfum á ný. „Þá skipti það hann miklu máli að geta skilið við þann kafla í lífi sínum sem leitt hafi til dómsins á árinu 2008,“ segir í dómi.
Ákæruvaldið sem fór með málið fyrir dóm færði þau rök að hann ætti ekki fá aftur réttindin vegna eðlis og alvarleika brota hans. Hann hafi jafnframt tekið að sér að verja menn sem hafi verið ákærðir fyrir kynferðisbrot gegn börnum.
Í dómi segir að nú hafi Róbert óflekkað mannorð. „Að því virtu er það mat dómsins að ekki verði talið að sóknaraðili sé að svo komnu ekki verður þess að rækja starfann eða njóta réttindanna,“ segir í dómi.
Mörg hundruð nöfn á skrá
Róbert Árni var dæmdur árið 2008 fyrir kynferðisbrot gegn fjórum stúlkum á aldrinum fjórtán til fimmtán ára. Hann var með 335 kvenmannsnöfn á skrá hjá sér. Við nafnanna hafði hann skrifað aldur kvennanna. Ein stúlknanna var í helgarleyfi frá meðferðarheimili fyrir unglinga.
Við húsleit á heimili Róberts Árna fundust tveir farsímar. Rannsókn leiddi í ljós að símarnir höfðu verið í notkun með fjórum símanúmerum. Símana notaði hann til að hafa samskipti við stúlkurnar undir ýmsum nöfnum svo sem „Árni“ og „Robbi“. Hann notaði jafnframt MSN-spjallforritið til að tæla ungar stúlkur undir fölsku flagi en hann þóttist vera sautján ára strákur.
Hann var enn fremur dæmdur fyrir vörslu barnakláms. Á heimili hans fundust fimm myndbandsspólur og ríflega hundrað ljósmyndir á tölvu hans sem sýndu börn á kynferðislegan og klámfenginn hátt.
Orðrómur um barnagirnd var lengi á kreiki
DV fjallaði ítarlega um mál Róberts árið 2008. Í frétt DV frá 27. september frá því ári segir:
„Róbert Árni hefur ekki áður fengið dóm vegna kynferðisbrota, en orðrómur um barnagirnd hans hefur lengi verið á kreiki. Í síðasta helgarblaði DV hafði mjög reynslumikill lögmaður í Reykjavík þetta um Róbert Árna að segja: „Ég hef heyrt þann orðróm mjög lengi að hann sæki í unglingsstúlkur og það fer af honum það orð að hann sé perri. Hann hefur alls ekki gott orð á sér miðað við að vera lögmaður.“
Fyrrverandi starfsmaður í Laugardalslaug greindi DV einnig frá því á sínum tíma að hann hefði vísað Róberti úr lauginni eftir að hann hafði berað sig við stúlkur í kvennaklefanum seint á áttunda áratug síðustu aldar. Róbert neitaði alla tíð sök og sagði á sínum tíma í viðtali við DV að ákæran væri röng og hann væri ósáttur við hana. Hann viðurkenndi þó að hafa haft kynmök við eina af stúlkunum, en neitaði því alfarið að hafa blekkt hana eða greitt henni fyrir kynlífsþjónustu. Frá því ákæran gegn Róberti Árna var þingfest og þar til hann var sviptur lögmannsréttindum tók hann að sér að verja aðra kynferðisbrotamenn.
Fjallað var um mál Róberts í Kompás og má sjá þáttinn hér fyrir neðan.