Teiknað í loftið

Límband er helsti efniviður pólsku listakonunnar Moniku Grzymala sem opnaði sýningu á verkum sínum í galleríinu Berg Contemporary á föstudag. Verk Moniku eru oftar en ekki staðbundnar og skammvinnar innsetningar þar sem hún notar límbandið til að draga línur í rýmið sem hún fær úthlutað, þær stökkva af veggjunum og út í rýmið og mynda eins konar þrívíddarteikningar, það sem hún kallar „Raumzeichnung“ upp á þýska tungu – en þar í landi hefur hún búið og starfað um árabil.